वीरगन्ज । प्रथम वीरगन्ज गोल्डकप फुटबल प्रतियोगिताको उद्घाटन खेलमा भेट्रान्स सिटी क्लब वीरगन्जले भारत दिल्लीको गडवाल डायमन्ड फुटबल क्लबलाई ३–१ ले पराजित गरेको छ ।
निर्धारित समयमा दुवै टिमबाट गोल हुन नसकेपछि पेनाल्टी शुटआउटबाट निर्णय गरिएको थियो । आयोजक क्लबका सुशान्त थापा, नवीन लामा र जनक कार्कीले गोल प्रहार गरे । भेट्रान्सबाट कप्तान कृष्ण शाक्यले प्रहार विपक्षी गोलकिपर हर्षित विष्टले रोके ।
पाहुना टोलीका सुमित कद्यान, संकल्प सिंह र अन्जुल परिसरको पेनाल्टी भेट्रान्सका गोलकिपर राजु नगरकोटीले बचाएका थिए । डायमन्डबाट अजय विष्टको पेनाल्टी मात्र गोलमा परिणत भयो ।
तीन पेनाल्टी रोकेका भेट्रान्सका गोलकिपर राजु नगरकोटी म्यान अफ द म्याच भए । मधेश प्रदेशकै उच्च धनराशि पुरस्कार प्रथम वीरगन्ज गोल्डकप जित्ने टिमले ११ लाख ११ हजार ११ सय रुपैयाँ र उपविजेताले ५ लाख ५५ हजार ५ सय रुपैयाँ पुरस्कार पाउनेछन् ।
प्रतियोगितामा भारतका दुई र नेपालका ६ टिमले प्रतिस्पर्धा गर्नेछन् । आइतबार संकटा र चर्च ब्वाइज युनाइटेडले प्रतिस्पर्धा गर्नेछन् ।
वीरगन्ज महानगरपालिकाका मेयर राजेशमान सिंहले प्रतियोगिताको उद्घाटन गर्दै विगतमा खेलकुदका लागि उर्बरभूमि रहेको वीरगन्जमा अहिले सुस्त बनेकोमा चिन्ता व्यक्त गरे । गोल्डकप आयोजना गर्न आदर्शनगर खेलमैदानमा अस्थायी प्यारापिट निर्माण गरिएको छ । ईकान्तिपुर
यो वेबसाइट पर्दाफास मिडिया प्रा.लि.को आधिकारिक न्यूज पोर्टल हो । जसले नेपाली भाषाको राजनीति, व्यापार, अन्तरवार्ता तथा विचार लगायत समाचार प्रकाशनको साथै मनोरंजन, खेलकुद तथा खोजमुलक सत्य, तथ्य र निष्पक्ष तरीकाले, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेटदछ्।
प्रतिक्रिया दिनुहोस् !