दोस्रो वीरगंज गोल्डकपको उपाधी नेपाल पुलिस क्लबलाई

वीरगंज । दोस्रो वीरगंज गोल्डकप फुटबल प्रतियोगीताको उपाधी विभागीय टोली नेपाल पुलिस क्लबले हातपार्न सफल भएको छ । आर्दशनगर रंगशालामा शनिवार भएको खेलमा टाईब्रकेरमा नेपाल पुलिस क्लबले ३–० गोलअन्तरले मच्छिन्द्र फुटबल क्लबलाई पराजित गरेको थियो ।
खेलको सुरुमा हाबि देखिएको मच्छिन्द्र फुटबल क्लबले दोस्रो हाफमा कमजोर प्रदर्शन गरेको देखिएको थियो ।
खेलको पहिलो हाफ सम्म एक गोलले अग्रता बनाएको मच्छिन्द्रले दोस्रो हाफमा भने बराबरीमा पुगेको थियो । खेलको ५८ औ मिनेटमा नेपाल पुलिस क्लबका खेलाडी बिकाश विकले गोल गरेर टिमलाई खेलमा फर्काएका थिए ।
खेल निर्धारित समयमा नसक्दा टाईब्रेकरमा गएको थियो । टाईब्रेकरमा नेपाल पुलिस क्लबका कप्तान रामचन्द्र वाजी, खेलाडी संजीव लामा, गोलकिपर अमित टामाटा र उज्जवल राईले हानेका थिए । जसमध्ये राईले हानेको बल पोष्ट भन्दा बाहिर गएको थियो ।
यस्तै टाईब्रेकरमा मच्छिन्द्रका बिशाल तामाङ्ग, दिवाकर चौधरी र समिरराज थोकरले हानेका थिए । जसमध्ये तामाङ्ग र चौधरीले हानेको बल पोष्ट बाहिर गएको थियो भने थोकरले हानेका बल किपरले रोकेका थिए ।
मधेस प्रदेश कै सर्वाधिक धनराशि भएको दोस्रो वीरगंज गोल्डकप प्रतियोगितामा विजेता टोली नेपाल पुलिस क्लबले नगद ११ लाख ११ हजार एक सय एघार रुपैयाँ, ट्रफी, मेडल र प्रमाणपत्र पाएको थियो ।
यस्तै उपविजेता मच्छिन्द्र फुटबल क्लबले पाँच लाख ५५ हजार पाँच सय ५५ रुपैयाँ नगद, ट्रफी,मेडल र प्रमाणपत्रले पुरस्कृत गरिएको थियो ।
फाईनल खेलमा म्यान अफ दि म्याच मच्छिन्द्रका समिरराज थोकर भएका थिए । उनले नगद १० हजार र शिल्ड पाएका थिए ।
यस्तै उत्कृष्ट गोलकिपर नेपाल पुलिसका गोलकिपर अमित टामाटा घोषित भए उनले नगद २० हजार र शिल्ड पाएका थिए ।
यस्तै उत्कृष्ट खेलाडीमा नेपाल पुलिस क्लबका कप्तान रामचन्द्र वाजी घोषित भए । उनले ईलेक्ट्रीक स्कुटी पाएका थिए भने उत्कृष्ट प्रशिक्षक नेपाल पुलिस क्लबका चेतन घिमिरे साबित भए । उनले नगद २० हजार र शिल्ड पाएका थिए ।
प्रतियोगिताको समापन समारोहमा प्रमुख अतिथि वीरगंज महानगरपालिकाका प्रमुख प्रशासकीय अधिकृत अरविन्द लाल कर्ण तथा विशिष्ट अतिथि पर्साका प्रमुख जिल्ला अधिकारी गणेश अर्याल र पर्साका प्रहरी उपरीक्षक गौतम मिश्रले उपाधि विजेता र उपविजेता टिमलाई नगदराशीको पुरस्कार सहित ट्रफी र मेडल प्रदान गरेका थिए ।