दोस्रो वीरगंज गोल्डकप : नेपाल पुलिस क्लब फाईनलमा प्रवेश

वीरगंज । दोस्रो वीरगंज गोल्डकप फुटबल प्रतियोगीताको फाईनलमा नेपाल पुलिस क्लब प्रवेश गरेको छ । बुधबार भएको पहिलो सेमिफाईनल खेलमा आयोजक वीरगंज युनाईटेड क्लबलाई सडेन डेथमा हराउँदै नेपाल पुलिस क्लब फाईनलमा प्रवेश गरेको छ ।
आर्दशनगर रंगशालामा जारी खेलमा निर्धारित समयमा दुबै टिम बिना गोल बराबरी खेलेपछि खेल टाईब्रेकरमा धकेलिएको थियो । टाईब्रेकरमा पनि दुबै टिमको स्कोर बराबरी भएपछि खेल सडेन डेथमा प्रवेश गरेको थियो ।
टाईब्रेकरमा पुलिसका लागी उज्जवल राई, रामचन्द्र वाजी, संजीव लामा, अमित टामाटा, विवेक पाण्डेले हानेका थिए । जसमा राईले पोल बाहिर र लामाले हानेको बल किपरले रोकेका थिए ।
त्यसपछि सडेनडेथमा पुलिसका शिशिर चौधरी, निरज खड्का, प्रज्जवल चौधरी र सुनिल तामाङ्गले गोल गरेका थिए ।
टाईब्रेकरमा वीरगंजका आशा गुरुङ्ग, सनतबहादुर गुरुङ्ग, सिशस थापा, बल्टोर र कृपाकान्त चौधरीले हानेका थिए । जसमा सन्तबहादुरले हानेको बल किपरले रोके भने बल्टोरले हानेको बल पोलमा लडेको थियो ।
त्यसपश्चात सडेनडेथमा वीरगंज अजित चौधरी, ब्रिकम ठाकुर, प्रमजय चौधरी र विवेक चौधरीले हानेका थिए । जसमा विवेकले पोष्ट बाहिर हानेका थिए । खेलमा म्यान अफ दि म्याच नेपाल पुलिस क्लबका गोलकिपर अमित टामाटा घोषित भएका थिए । उनले नगद १० हजार र शिल्ड पाए ।
बिहिबार हुने दोस्रो सेमिफाईनल खेलमा मच्छिन्द्र फुटबल क्लब र सहलेस फुटबल क्लब सिरहा बिच हुने आयोजकले जनाएको छ ।