चर्च ब्वाइजलाई पराजित गर्दै मच्छिन्द्र फुटबल क्लब सेमिफाईनलमा

वीरगंज । मधेस प्रदेश कै सर्वाधिक धनराशि भएको वीरगंजमा जारी दोस्रो वीरगंज गोल्डकप फुटबल प्रतियोगीतामा मंगलबार भएको खेलमा एपिआई चर्च ब्वाइज युनाइटेड काठमाडौंलाई हराउँदै मच्छिन्द्र फुटबल क्लब सेमिफाईनलमा प्रवेश गरेको छ ।
आर्दशनगर खेल मैदानमा भएको सो खेलमा मच्छिन्द्र फुटबल क्लबले २–१ गोल अन्तरले एपिआई चर्च ब्वाइज युनाइटेडलाई हराएर सेमिफाईनमा प्रवेश गरेको छ । खेलको ५४ औं मिनेटमा मच्छिन्द्र फुटबल क्लबका कप्तान रेजीन सुब्बाले पहिलो गोल गरेका थिए ।
खेलको ७६ औ मिनेटमा एपिआई चर्च ब्वाइज युनाइटेडका कप्तान डिका सेर्गेले गोल गरे । खेलमा दुबै टिम जितको दाउमा रहे पनि खेलको निर्धारित समयमा थप अतिरिक्त ५ मिनेट थपिएको थियो । सोही समयलाई सदुपयोग गर्दै अन्तिम मिनेटमा मच्छिन्द्र फुटबल क्लबका कप्तान रेजीन सुब्बाले आफ्नो दोस्रो गरेर टिमलाई जिताएका थिए ।
खेलमा म्यान अफ दि म्याच मच्छिन्द्र फुटबल क्लबका कप्तान सुब्बा नै घोषित भए । उनले नगद १० हजार सहित शिल्ड पनि पाएका थिए । बुधबार हुने पहिलो सेमिफाईनल खेलमा आयोजक वीरगंज युनाईटेड क्लब र नेपाल पुलिस क्लबले प्रतिस्पर्धा गर्ने आयोजकले जनाएको छ ।