दैनिक दुई लाख कमाउने यातायातका अधिकृत रंजित साह माथि अख्तियारद्धारा छानबिन सुरु

जितेन्द्र कुमार ।
वीरगंज । दैनिक दुई लाख कमाउन सफल कर्मचारीको रुपमा चिनिने अधिकृत रंजित साह माथि अख्तियार दुरुपयोग अनुसन्धान आयोग हेटौंडाले छानबिन प्रक्रिया अगाडि बढाएको छ ।
यातायात व्यवस्था कार्यालय सवारी शाखा मोटरसाईकल फाँटमा कार्यरत्त अधिकृत साहले गरेका कालाकर्तुतहरुको बारेमा प्रमाण सहित यस अनलाईनमा समाचार प्रकाशन भए पछि अख्तियारले छानबिन प्रक्रिया अगाडि बढाएको हो ।
रौतहट यातायात कार्यालयमा भ्रष्ट अधिकृत साहको दरबन्दी रहे पनि उनी काजमा वीरगंजमा आई कानुनलाई खिल्ली उडाउदै “एनी हाउ पैसा कमाउ” अभियानमा जुटेको उनले गरेको कालाकर्तुतहरुको प्रमाणले पुष्टि गरेको छ ।
अधिकृत साहले गाडी धनीको अनुपस्थितिमा पनि ब्लुबुक प्रतिलिपीमा एक हजार देखि दुई हजार सम्म र सनाखत नामसारीमा प्रति ब्लुबुक २ हजार देखि ३ हजार सम्म असुलेर दैनिक सयौं ब्लुबुक प्रतिलिपी र सनाखत नामसारीका काम गर्ने गरेका छन् । भ्रष्ट अधिकृत साहले सनाखत नामसारी गरेको दर्जनौं प्रमाणहरु यस अनलाईन सँग सुरक्षित छ ।
अधिकृत रंजित साहले गरेका सनाखत नामसारी ना ४३ प २१८५, ३५८२, ना ५७ प ६९५३ नम्बरको मोटरसाईकल, स्कूटर लगायतका गाडीहरु र मधेश प्रदेश ०३–०३३ प ३५५३ को मोटरसाईकल वीरगंज भन्सार कार्यालयद्धारा गरिएको लिलामीमा गाडी दर्ता गर्दा अनियमित्त तरिकाले गरेको प्रमाण सहित समाचार प्रकाशमा आईसकेको छ ।
यातायात व्यवस्थापन कार्यविधि निर्देशिका २०७४ को ११.१.८ मा सवारी नामसारी गर्दा अवलम्बन गर्नुपर्ने विषयहरु प्रष्ट रुपमा लेखिएको छ ।
सवारी धनीले आफ्नो सवारी विक्री वा नामसारी गर्नुपरेमा प्रचलित कानुन बमोजिम लाग्ने दस्तुर तिरी सवारी विक्री गर्ने तथा खरिद गर्ने दुबै पक्षको रोहबरमा निम्न अनुसारको प्रक्रिया पुरा गरेको हुनुपर्नेछ । नियमावलीको अनुसुचि –१२ को ढांचामा निवेदन फारम भरी रु. १० को टिकट टांसी कार्यालयमा निवेदन दिनुपर्ने व्यवस्था रहेको छ ।
सवारी साधन कार्यालयमा अनिवार्य रुपमा ल्याई सवारीको नामसारी गर्दा खरिदकर्ता तथा विक्रीकर्ता दुबै जना कार्यालयमा उपस्थित हुनुपर्ने व्यवस्था रहेको छ । सवारी विक्री गर्ने सवारी धनीले नामसारीका बखत उपस्थित हुन नसक्ने भई सो नामसारी हुने मिति भन्दा अगाडि सवारी धनी कार्यालयमा उपस्थित भई सम्बन्धित श्रेस्ता एवं नामसारी फारममा ल्याप्चे सही छाप सहित सनाखत गर्न कार्यालयमा निवेदन दिएमा सो निवेदन मोनासिव लागेको खण्डमा सम्बन्धित फाँंटका अधिकृतले निजको सक्कल नागरिकता सहितको कागजात हेरी सो व्यवहोरा प्रमाणित गरि दिएको अवस्थामा मात्र सोही सनाखतको आधारमा सनाखतको मितिले ३५ दिन भित्र नामसारी गर्न सकिने व्यवस्था रहेको छ ।